Riola Xhemaili i jep Zvicrës çerekfinalen historike – gol në minutën e 92-të, festë në gjithë vendin
Stadiumi i Gjenevës nuk do ta harrojë kurrë atë moment të minutës së 92-të: Zvicra ishte vetëm një hap larg eliminimit nga Kampionati Evropian për femra, ndërsa Finlanda udhëhiqte dhe ëndrra për çerekfinalet po shuhej. Por gjithçka ndryshoi falë një vajze 22-vjeçare me rrënjë shqiptare – Riola Xhemaili.
Pas një krosimi të saktë nga Geraldine Reuteler, Riola – e futur në lojë vetëm dhjetë minuta më parë – e dërgoi topin në rrjetë me një goditje të sigurt. Rezultati barazohet në 1:1 dhe Zvicra siguron për herë të parë në histori një vend në çerekfinale të Euro 2025 për femra. Stadiumi me mbi 26 mijë tifozë shpërtheu në festë, ndërsa mbi 1 milion shikues ndoqën ngjarjen para ekraneve.
“Goli që do të mbetet përgjithmonë në historinë e futbollit zviceran”, shkroi gazeta “20 Minuten”. Dhe me të drejtë – ky nuk ishte thjesht një gol, por një simbol shprese dhe vendosmërie.
Riola, pavarësisht se shkëlqeu këtë sezon me PSV Eindhoven në Holandë me 14 gola dhe 6 asistime, nuk ishte gjithmonë pjesë e planeve të trajneres Pia Sundhage. Ajo u la jashtë disa grumbullimeve, shpesh në pritje, por nuk u dorëzua. Dhe kur iu dha rasti – ajo u bë heroinë.
“Kam dashur të vrapoj drejt tifozëve, por kishte një rrethojë… nuk doja të rrëzohesha,” tha Riola mes të qeshurave, pas përfundimit të ndeshjes. “Është ndjenja më e mirë që kam ndjerë ndonjëherë. Është një ëndërr që u bë realitet.”
Ajo vetë besonte te momenti i saj. “E kam ditur se do ta shënoj atë gol. Thjesht duhej të mos isha në ofsajd,” shtoi ajo me buzëqeshje.
Kapitenia Lia Walti nuk kurseu lëvdatat: “Rio ka diçka që të tjerat nuk e kanë – bën gjëra që nuk i pret askush. Jam jashtëzakonisht krenare për të.”
Zvicra vazhdon ëndrrën në Euro 2025, ndërsa një vend i tërë feston dhe beson – falë një futbollisteje që asnjëherë nuk humbi shpresën: Riola Xhemaili.
